1. Ընդհանուր դրույթներ
Սույն քաղաքականությունը սահմանում է «Հիպնոսի և հիպնոթերապիայի հայկական ասոցիացիա» ՀԿ-ի (այսուհետ՝ Ասոցիացիա) կողմից անդամակցության հայտատուների և գործող անդամների անձնական տվյալների հավաքագրման, մշակման, պահպանման և պաշտպանության կարգը՝ համաձայն «Անձնական տվյալների պաշտպանության մասին» ՀՀ օրենքի։

2. Ի՞նչ տվյալներ են հավաքագրվում
Անդամակցության օնլայն հարցաշարը լրացնելիս Ասոցիացիան հավաքագրում է հետևյալ տվյալները.

• Նույնականացման տվյալներ․ Անուն, ազգանուն, հայրանուն, ծննդյան ամսաթիվ, անձնագրի կամ ID քարտի պատճեն։
• Կոնտակտային տվյալներ․ Հեռախոսահամար, էլեկտրոնային փոստի հասցե, աշխատանքային/գործունեության հասցե։
• Մասնագիտական տվյալներ․ Ինքնակենսագրություն (CV), բարձրագույն և մասնագիտական կրթության դիպլոմների/սերտիֆիկատների պատճեններ, տեղեկություններ պրակտիկ փորձի և սուպերվիզիաների վերաբերյալ։
• Մուլտիմեդիա․ Դիմողի էլեկտրոնային լուսանկարը։

3. Տվյալների մշակման նպատակները
Ձեր կողմից տրամադրված տվյալները մշակվում են բացառապես հետևյալ նպատակներով.

1. Որակավորման ստուգում․ Ասոցիացիայի Մանդատային և Մասնագիտական հանձնաժողովների կողմից Ձեր կրթության և փորձի համապատասխանությունը Ասոցիացիայի անդամակցության չափանիշներին գնահատելու համար։
2. Ներքին հաշվառում․ Ասոցիացիայի անդամների ներքին տվյալների բազայի ձևավորման և անդամակցության ID քարտերի պատրաստման համար։
3. Պաշտոնական Ռեեստրի հրապարակում․ Լիիրավ և Ասոցիացված անդամների դեպքում՝ մասնագիտական տվյալների (անուն, ազգանուն, կարգավիճակ, լուսանկար, գործունեության հասցե, մասնագիտացման ուղղություններ և հանրային կոնտակտներ) ներառում Ասոցիացիայի պաշտոնական կայքի հանրամատչելի ռեեստրում։

4. Տվյալների պահպանումը և Անվտանգությունը

• Գաղտնիության երաշխիք․ Ասոցիացիան ապահովում է հավաքագրված տվյալների (հատկապես անձնագրային տվյալների և դիպլոմների պատճենների) խիստ գաղտնիությունը։ Այս տվյալները հասանելի են միայն հայտերը քննող լիազորված անձանց (Խորհրդի անդամներ, քարտուղարություն):
• Երրորդ անձանց փոխանցման արգելք․ Ձեր անձնական փաստաթղթերը և փակ տվյալները երբեք չեն փոխանցվի, վաճառվի կամ տրամադրվի երրորդ անձանց կամ առևտրային կազմակերպություններին, բացառությամբ ՀՀ օրենսդրությամբ ուղղակիորեն սահմանված դեպքերի (օրինակ՝ իրավապահ մարմինների պաշտոնական հարցման դեպքում)։
• Պահպանման ժամկետը․ Անդամակցության մերժման դեպքում Ձեր կցած ֆայլերը հեռացվում են համակարգից 6 ամսվա ընթացքում։ Անդամակցության հաստատման դեպքում տվյալները պահպանվում են Ասոցիացիայի անդամության ամբողջ ժամանակահատվածում։

5. Հայտատուի իրավունքները
Դուք իրավունք ունեք ցանկացած պահի դիմել Ասոցիացիային՝

• Ծանոթանալու Ձեր պահպանվող տվյալներին,
• Պահանջելու փոփոխել կամ ուղղել սխալ տվյալները,
• Պահանջելու հեռացնել Ձեր տվյալները հանրային ռեեստրից (ինչը կհանգեցնի անդամակցության կասեցման կամ դադարեցման, քանի որ ռեեստրում լինելը անդամության պարտադիր պայման է)։